Siyaasiyintu inta badan marka ay doorashada iyo tartanka madaxnimada ay galayaan,waxa ay aad u lulaan Farta, marka ay doorashadii ay u halgamayeen ay helaana waxa ay lumiyaan oo la waayaa kalsoonidii ay dadku ku qabeen.
Abwaan keenii waynaa ee Ibraahim sh.Saleeban(gadhle) IHN oo ahaa hal-abuur aan la heli karin , ayaa isagoo tilmaamaya kala duwanashaha qalbiga siyaasiga iyo waxa uu afka ka leeyahay ,waxa uu ku sifeeyay Warabahii yidhi "waxa aan rabaa in la iga badalo magaca Waraabe la iina baxsho magaca AAMIIN"ayaa tixdan Jiiftada ah ku yidhi:
Abaandulayaashii
Ina soo abaabulay
Shalay olalaheeniyo
Orta iyo cayaaraha.
Addin bay ku tumayeen
midna iimaybuu jiray
In amuurtu taa tahay
Aan idiin asteeyee
Ayaxii hadduu tagay
Ugxantii dillaacdaa
Ummadda umarkhaatiya
Waraabaa ayaan yidhi
Haddaad igu ogaydeen
Baadida islaamkiyo
Anoo aaran geel cuna
Iimaan la'aantii
istaaqfurula baan idhi
Aamiin baanan kala baxay
magacii Inkaarnaa
Isagoo ujeedo leh
Orgibaa ninbaa gawracay
Indhashuu usadhay laan
Waa amaanadaadee
Sii ilaali buu yidhi
markuu tegay islaankii
Inyar haddii uu maqan yahay
Agagaas dhurwaagii
Amba-qaad talaabada
Hadba soo ogaal durug
Eeg-eeg hilbaha dagan
Ursay jeenyihii hore
Wuxu yidhi udgoonaa
Amarrow markii xigay
Af balaadhan kala qaad
Carrab ooman soo saar
Awlalada ka leef-leef
Wuxu yidhi alleylehe
Oon xalaala baan helay
Aadbuu cantuugada
Adhaxda uga buuxsaday
Kolay araracdii tahay
Alamsay laf iyo jiidh
Inyar neefkii kama tegin
Duqa imashadiisii
Eedaysanihii bood
Oodiyo dhirtii jiidh
Ereybaase laga helay
Ku arooray maahmaah
Isagoo ordaayoo
Afar-qaadayuu yidhi
Waxaad igu ogaateen
Wixii aan ahaan jiray
Gaarriyoow ma' iishoow
Uf qabiilkii aad tidhi
Hadduu adiga kuu uray
Ragbaa jira ku uunsada
markuuse aarku soociyo
Haddaan eelo-weyntiyo
Aarankaygu iga didin
Waan ka aarsanlaa doqon
Intase aan afkaartiyo
Aragtidu midays nayn
nacas weyga adag yahay.
ALLA MAHAD LEH.
No comments:
Post a Comment