Inta badan Abwaanada Somaliyeed waxa ay gabayada iyo maansooyinka ay tiriyaan ku cabiraan kagana faaloodaan dhicdooyin hore u dhacay ,kuwo hada taagan iyo dhacdooyin la fili karo in ay mustaqbalka dhaw iyo kan fogba ay iman karaan.
Hadaba Abwaan Sandoon waxa uu maansadan ku cabirayaa rayigiisa iyo rayiga ay dad wayne aad u farabadani ay la qabi karaan,waana mid uu ku saxan yahay madamaa uu abwaan yahay carabkiisuna uu ka turjumaaya rabitaanka iyo baahida dadwaynaha.
Abwaan Sandoon waxa uu maansadan kula hadlayaa Madaxwaynaha Somaliland Mudane Muuse Biixi Cabdi,waxa uu abwaanku aftahan-nimo iyo hibada hal-abuurnimadiisa maanso ugu sheegayaa madaxwaynaha,isaga oo ku boorinaaya in ka run sheego balanqaadkii iyo dhaartii dharaarta cad uu madaxwaynahu Kitaabka Quraanka ah Baalaha uu jaray.
Abwaan Sandoon waxa aad Maansadiisa ka dheehanaysaa in Durba Madaxwaynahi balanqaadyadii laga filaayay qaarka mida uu baalmaray,hadana iyada oo ay sidaa tahay Abwaanku maaha mid Madaxwaynahiisa quus ka jooga,waaxaanad arkaysaa in markasta oo Abwaanku madaxwaynaha kusoo celcelinaayo in uu saxo wixii qaldan si uu uga duwanaado rag badan oo Somaliland madax kasoo noqday.
Waatan Maansada Muuse dabaqabo!!
''''''''''''"""""""""""""""""""""""""""
Madax Qaraniyo
Qaa'idka dalkoow
Salaan qaaliya
Muuse iga qabo
Qodob ii xiga
Qudbaddaadii
quruxda lahayd
Qaladkaan galo
Iqabtaad tidhi !!
Aan ku qabannee
Ma qabsoontaa?!!
Qodob ii xiga
Qabanqaabiyo
Ballanqaadkii
Qaanuunkeenniyo
Qaraar iyo xeer
Distoorkaa qoran
Qarankoo idil
Haw xaq-qaadiyo
Qorshahaagii
Wuu qalloocdaye
Muusow dabaqabo.
Qodob ii xiga
Aan ku qabannee
Inuu quudkii
Qiimo-bararoo
Qaali dhaafoo
Qarashyare kacay
Quraac li'idiyo
Qatanaantiyo
Qadoodiga jira
Muuse dabaqabo.
Qodob ii xiga
Aan ku qabannee
Qaylo-dhaantiyo
Quruumaha kacay
ee qamaamsani
Qooraan eegmada
qoorta kaga jabay
Wasiir qaraxiyo
Qayladiisiyo
Qawda maqashii
Waxna hawqaban
Qaladaad badan
Oo la qoonsaday
Qawadkaa jira
Muuse dabaqabo.
Qodob ii xiga
Aan ku qabannee
Qof gaboobiyo
Qaar bukaaniyo
Laxaad qaar gabay
Dhallaan qaadhiyo
Qayladoodii
Qubays daayoo
Dhuun waxqooyiyo
Biyaa quus galay
Muuse dabaqabo.
Qodob ii xiga
Aan ku qabannee
Qoysas iyo dumar
Qamar iyo Luul
Hablo qaaliya
Oo xorriyad qawl
Qunyar ku cabbiray
Qabqabtaaydiyo
Qoolka soo sudha
Jeelna qabadsii
Ka qashaafoo
Ceebaa qaar diid.
Qodob ii xiga
Aan ku qabannee
Qallaf hadalkiyo
Qawlka sharafdhacay
Cuqdad qubatiyo
Qabiil cayga leh
Buugga lagu qoray qadaafada taal
Muuse dabaqabo.
Qodob ii xiga
Aan ku qabannee
Dabin iyo qool
Aan qarsoonayn
Cadaw qaxarbadan
Oo qadiimiya
Oo qulqulad jecel
Badda qawliyo
Qoorrigeennii
Qayb hayeeshoo
Hayska qaatee
Qalin ugu duug
Waa qasaaree
Muuse dabaqabo.
Qodob ii xiga
Aan ku qabannee
Qarankeennii
Ina qaadee
Quwad iyo xoog
Laysu qayshaday
Ha qobtolinoo
Qolo haw celin
Qabiil iyo Qaran
Bal qiyaasoo
Isu qiimee
Keebaa quruxbadan?
Qodob ii xiga
aan ku qabannee
Qormadeennii
Qabyo badanbaa
Wax ka qabashiyo
Qalliin culusiyo
Qiil u baahane
Qarashkoodii
Loo qarriraybaa
Layska qaatee
Muuse dabaqabo.
Qodob ii xiga
Aan ku qabannee
Dhallin quruxiyo
Qiimo badanoo
Qalinjebiyoo
U qalmaayoo
Hawsha qabankara
Oo qabiilnimo
Qaar xaggeenna ah
Looga qaadoo
Qoonde reerkay
U qarrirantee
Muuse dabaqabo.
Qodob ii xiga
Aan ku qabannee
Garsoor qiilbadan
Bulsho qayliyo
Qaaq ka muujeen
Dulmi lagu qiray
Oo dhib laguqabo
Sinnaanna ka qaday
Muuse dabaqabo
Qodob ii xiga
Aan ku qabannee
Qarankii dumay
Ee Siyaad qubay
Dulmi qaraweyn
Qoorta hoo sudho
Quudhsigii aan
Qaadanwaynee
Miino qaraxdiyo
Qori ka xigsaday
Waar qaxeennii
Saw qudhaadani
qori maad sidan
Saw qarfiyo buur
Dhufays kama qodan
Qacda suugiyo
Shilke qayshiyo
Qamta sebenkiyo
Kaare qoor dheer
Qaaca ololkiyo
Qiiqu kuma marin?
Maxaa loo qaxay?
Maxaa qamadida
Quudka loo biday?
Raggu qayrkii
Wuu qaddariyaa
Raad dib hawqaban.
Qodob ii xiga
Aan ku qabannee
Axdaad qaaddoo
Dhaar mid qaraweyn
Qoorta sudhataye
Qawlka Eebbiyo
Quraankiisii
Yay ku qbanine
Muuse dabaqabo.
Quwaddiisiyo Allaah qaaliba
Maansadan waxaa tiriyey Abwaan Yusuf Roobleh Xirsi (Sandoon) oo aad in badan uga barateen maansooyin iyo gabayo kuwan oo kale ah.
No comments:
Post a Comment